नेपाली सुरक्षा गार्डले यसरी मन जिते मलेसियामा, भिडियो बन्यो भाइरल

२०७२ असार ४ गते 

सेवा गरे मिवा मिल्छ भन्ने उखान छ । अहिले सोसल मिडियामा भाइरल भैरहेको एउटा भिडियोले पनि यहीँ सन्देश दिन्छ ।

एक जना नेपाली सुरक्षा गार्ड जो परदेशी भूमीमा पसिना बगाइरहेका छन उनले देखाएको ब्यबहारबाट यतिबेला मलेसियाको इन्टरनेट प्रयोगकर्ताको मन जितेको छ । एक मगन्तेलाई उनीहरुले गरेको ब्यबहार र बोलीले नेपालीको महानता झल्काउँछ ।

मलेसियाका स्थानीय मिडिया प्रोडक्सन हाउस म्याक्सम्यान टेलिभिजनले तयार पारेर अनलाइनमा पोष्ट गरेको यो भिडियो ६ मिनेटको रहेको छ । सामाजिक अनुभुति प्रकट गर्ने यो भिडियोमा एउटा प्रमुख पात्र राजधानी क्वालालम्पूरको सडकमा भिखारीको भूमिकामा प्रस्तुत भैरहेको हुन्छ र बटुवाहरुसँग पैसा मागिरहेको हुन्छ ।

भिडियोको मुख्य पात्रको रुपमा रहेको अपरिचित उक्त कलाकार सहरका सडकहरुमा रित्तो कागजी कप तथा माया गर्नुहुन्छ भने बाँड्नुहोस् भन्ने सन्देश सहितको कार्डबोर्ड सहित मानिसहरुसँग पैसा मागिरहेको हुन्छ ।

भिडियोको सुरुवाती भागमा उक्त मगन्तेलाई धेरै बटुवाहरुले बेवास्ता गरेको तथा केही दयालु मानिसहरुले पैसा दिएर सहयोग पनि गरेको देखिएको छ ।

त्यसपछि कथाले भिन्नै मोड लिन्छ । मगन्तेको स्वरुपमा रहेको उक्त मानिस एकाएक नायकको भूमिकामा आउँछ र आफुलाई पैसा दिने मानिसहरुलाई उक्त पैसा फिर्ता गर्छ, त्यो पनि केही पैसा थपथाप पारेर । कतिपयलाई त ५० रिंगिट थप गरेर पनि उसले पैसा फिर्ता दिन्छ । जसका कारण मानिसहरु आश्चर्यचकित बन्दछन् ।

आफुले यस्तो अभिनय गर्नुको कारणबारे बताउँदै उसले त्यहाँ उपस्थित मानिसहरुलाई यो आफ्नो टोलीले गरिरहेको सामाजिक अनुभव सम्बन्धि एक अध्ययनको भाग रहेको खुलासा गर्छ ।

मगन्ते बनेर पैसा मागिरहेको उक्त कलाकारलाई पैसा दान गर्न स्थानीय ट्याक्सी ड्राइभरदेखि अन्य सर्वसाधारण पनि अघि सरे । तर तीनजना नेपाली सेक्युरिटी गार्डको दयालु व्यवहारले नेटिजन्स अर्थात् इन्टरनेटमा यो भिडियो हेर्नेहरुलाई सबैभन्दा बढि अचम्ममा पार्यो, ताजुब बनायो ।

ती तीनजना नेपाली सेक्युरिटी गार्डले आफुले उसलाई गरेको पैसा सहयोग फिर्ता लिन मानेनन् । ऊ कुनै मगन्ते नभै कलाकार हो र त्यो उसले गरेको एक अध्ययनको पाटो हो भन्ने कुरा खुलाउँदा पनि उनीहरुले पैसा फिर्ता लिन मानेनन् ।

एकजना नेपालीले भनेका छन्, ‘हाम्रो संस्कारले तिमीबाट पैसा लिन छुट दिँदैन ।’

त्यसपछि उक्त कलाकारले तपाइँहरुसँग पर्याप्त पैसा नहुँदा नहुँदै पनि किन मलाई सहयोग गर्न चाहनुहुन्छ ? भनेर प्रश्न सोध्दछ । प्रश्न भुइँमा झर्न नपाउँदै एक जना नेपालीले जवाफ दिन्छन्, ‘किनकी यदि हामीले कसैलाई सहयोग गर्यौँ भने हामीलाई भगवानले सहयोग गर्छन् ।’

त्यसपछि ती तीनजना नेपाली गार्डहरुले ती कलाकार तथा क्यामराम्यानहरुलाई आफु बस्ने होस्टलमा निम्तो दिन्छन् । त्यसपछि आफु र आफ्नो परिवारले सामना गरेका कठिनाइ तथा संघर्षको कथा सुनाउँछन् ।

‘मेरो परिवार राजमार्गको नजिकै बस्थ्यो’, नरेश नामका एक नेपाली युवा सुनाउँछन् । उनले हालैको विनाशकारी भुइँचालोबाट आफ्नो नेपालमा रहेको परिवारले भोग्नुपरेको समस्याको बारेमा सुनाए । कलाकार समूहले नेपाली कामदारको वासस्थानमा ती नेपालीसँग लामै भलाकुसारी गरे र घरपरिवारको बारेमा सोधपुछ पनि गरे ।

उनीहरुको त्यो कठिनाइ तथा दुःखको बारेमा सुनेपछि कलाकारमा दया पलायो । अन्ततः ती कलाकारले नेपालीहरुलाई १ हजार रिंगिट आर्थिक सहयोग प्रदान गरे । आफुले दिएको यो रकम सानो भएपनि दर्शकहरुले यो भिडियो देखेपछि थप सहयोग गर्ने आशा उनले व्यक्त गरे ।

भिडियोमा कलाकारले भनेका छन्, ‘उनीहरुले मलाई पैसा दान गर्छन् भन्ने मैले अपेक्षा गरेको थिइन, किनकी उनीहरु आफैसँग पैसा थिएन ।’

म्याक्सम्यान डट टिभीले अनलाइनमा राखेको यो भिडियो यु ट्युबमा अहिलेसम्म २६ हजार भन्दा बढिले हेरिसकेका छन् भने फेसबुकमा पनि झण्डै हजार जनाले शेयर गरेका छन् । यसले मलेसियालीहरुको मन जितेको छ । यो भिडियोमा हालैको भुकम्पमा परी नेपालीहरुले भोगेको क्षति, नेपाली कामदारले मलेसियामा गरेको संघर्ष नेपाली नेपालीहरुको उदार हृदयको विषयमा प्रकाश पारिएको छ ।

एकजना फेसबुक प्रयोगकर्ता मोहम्मद इर्स्याद स्याहमीले पोष्ट गरेका छन्, ‘पैसाले खुसी किन्न सकिँदैन, तर खुसी बनाउन सक्छ … यो भिडियोका लागि साधुवाद ।’

अर्का फेसबुके रुद्र कार्की लेख्छन्, ‘हामीले आफुसँग कति छ भन्ने कुराको परवाह नगरी अरुलाई सहयोग गर्नुपर्छ भन्ने कुरामा विश्वास गर्छौँ…..धन्यावाद म्याक्सम्यान टिभी ।’

Labels: Prabas